वीरगंज । वीरगंज महानगरपालिका वडा नं. ८ मा निर्माण सम्पन्न भएको नयाँ वडा कार्यालय भवन आज औपचारिक रूपमा उद्घाटन गरिएको छ। एक विशेष कार्यक्रमका बीच महानगरपालिकाका प्रमुख राजेशमान सिंहले भवनको उद्घाटन गर्दै सेवा प्रवाहमा सुधार आउने विश्वास व्यक्त गर्नुभयो।
महानगरपालिकाले आर्थिक वर्ष २०७९/८० मा सार्वजनिक बोलपत्र आह्वान गरी भवन निर्माण प्रक्रिया सुरु गरेको थियो। उक्त ठेक्का एसडी कन्स्ट्रक्सनले पाएको थियो र करिब ७९ लाख रुपैयाँको लागतमा निर्माण कार्य सम्पन्न गरिएको जनाइएको छ। भवन सञ्चालनमा आएसँगै वडा कार्यालयले अब आफ्नै आधुनिक तथा सुविधासम्पन्न संरचनाबाट सेवा दिन थालेको छ।
दुई तले पक्की संरचनामा तयार गरिएको यस भवनले सेवाग्राहीलाई थप सहज वातावरण उपलब्ध गराउने अपेक्षा गरिएको छ। यसअघि वडा कार्यालय आफ्नै भवन नहुँदा विद्यालयको कोठाबाट सेवा सञ्चालन गर्नुपरेको थियो, जसले गर्दा सेवाग्राहीले असुविधा झेल्दै आएका थिए।
उद्घाटन कार्यक्रममा बोल्दै प्रमुख सिंहले नयाँ भवनले सेवाको गुणस्तर सुधार्ने र कामकाजलाई थप प्रभावकारी बनाउने बताउनुभयो। उहाँले स्थानीय तहको सुदृढ विकासका लागि पूर्वाधार निर्माणमा निरन्तर जोड दिइने प्रतिबद्धता समेत व्यक्त गर्नुभयो।
कार्यक्रममा प्रमुख प्रशासकीय अधिकृत अरविन्द लाल कर्ण, विभिन्न वडाका जनप्रतिनिधि, स्थानीय बुद्धिजीवी, समाजसेवी तथा सर्वसाधारणको उल्लेखनीय उपस्थिति रहेको थियो।
