जनमत पार्टीका केन्द्रीय सदस्य तथा जिल्ला सह-इन्चार्ज मुकेश द्विवेदीलगायत नेताहरूले आज औपचारिक रूपमा जनता समाजवादी पार्टी (जसपा) मा प्रवेश गरेका छन्। यो घटनाले पर्सा जिल्लाको राजनीतिमा नयाँ समीकरणको संकेत गरेको छ।
जिल्ला सचिव शशी पाण्डे, वीरगञ्ज महानगर कमिटीका सचिव पवन साह कानु, जिल्ला सदस्य शशी भूषण शर्मा, छिपहरमाई गाउँपालिकाका पर्यवेक्षक राजु तिवारी र महानगरपालिका-१ का एकाइ सभापति चन्दन साह पनि जसपामा सामेल भएका छन्। नेताहरूले जसपाको विचार, नीतिहरू र नेतृत्वको क्षमताले आफूहरूलाई आकर्षित गरेको बताएका छन्।
द्विवेदीले आफ्नो धारणा राख्दै भने, “हामीले समावेशी र जनताको पक्षमा काम गर्ने दृढ संकल्पका साथ जसपामा सामेल भएका छौं। यो कदमले हाम्रो राजनीतिक यात्रालाई अझ प्रभावकारी बनाउनेछ।” अन्य नेताहरूले पनि स्थानीयस्तरमा समृद्धि र जनकल्याणका लागि योगदान दिने प्रतिवद्धता जनाएका छन्।
जसपाका नेताहरूले स्वागत कार्यक्रममा बोल्दै भने, “यी नेताहरूको आगमनले पार्टीलाई स्थानीयस्तरमा थप बलियो बनाउनेछ। आगामी दिनहरूमा जनताको सेवा गर्न एकजुट भएर अघि बढ्नेछौं।”
राजनीतिक विश्लेषकहरूले जनमत पार्टीका प्रमुख नेताहरूको यो कदमले जिल्लामा जसपाको प्रभावलाई उल्लेखनीय रूपमा बढाउने आकलन गरेका छन्। आगामी स्थानीय चुनावमा यसको प्रत्यक्ष प्रभाव देखिने सम्भावना रहेको छ।
