विराटनगर, चैत २ गते
कोशी प्रदेश प्रहरी कार्यालयले इलाका प्रहरी कार्यालय दमक, झापामा कार्यरत प्रहरी नायव उपरीक्षक (डिएसपी) किशोर लम्साललाई फागुन महिनाको “उत्कृष्ट प्रहरी” घोषणा गरेको छ।
प्रदेश प्रहरीका अनुसार लम्सालले फागुन महिनाभर शान्ति सुरक्षा कायम राख्न, अपराध नियन्त्रण गर्न तथा समुदायसँग प्रभावकारी समन्वय स्थापित गर्न उल्लेखनीय भूमिका निर्वाह गरेका कारण उक्त सम्मान प्रदान गरिएको हो।
विशेषगरी, झापा निर्वाचन क्षेत्र नं. ५ मा सम्पन्न प्रतिनिधि सभा सदस्य निर्वाचनलाई शान्तिपूर्ण र व्यवस्थित रूपमा सम्पन्न गराउन उनले महत्वपूर्ण भूमिका खेलेका थिए। संवेदनशील मानिएको उक्त क्षेत्रमा कुनै पनि अप्रिय घटना हुन नदिई निर्वाचन सम्पन्न गराउनु उनको प्रमुख उपलब्धि मानिएको छ।
त्यसैगरी, ‘Gen-Z’ आन्दोलनका क्रममा लुटिएका हतियार बरामद गर्न र फरार प्रतिवादीलाई पक्राउ गर्न उनले सक्रियता देखाएका थिए। प्रहरीका अनुसार लम्सालको नेतृत्वमा १९ जना प्रतिवादी पक्राउ परेका छन् भने हराएका हतियारसमेत फेला पारिएको थियो।
फागुन महिनामा दर्ता भएका ३५ मुद्दामध्ये ‘Gen-Z’ आन्दोलनसँग सम्बन्धित १० वटै मुद्दा सफलतापूर्वक फर्छ्यौट गरिएको प्रहरीले जनाएको छ। साथै, उनले स्थानीय निकाय, संघ–संस्था र स्थानीय बासिन्दासँग सहकार्य गर्दै आन्दोलनका क्रममा क्षति पुगेको प्रहरी कार्यालयको पुनःनिर्माण तथा व्यवस्थापनमा समेत नेतृत्वदायी भूमिका खेलेका थिए।
यसबाहेक, ध्वनि प्रदूषण नियन्त्रणका लागि २१७ वटा मोटरसाइकलमाथि कारबाही गर्नुका साथै विभिन्न मुद्दाका २२ जना फरार प्रतिवादी पक्राउ गर्न पनि उनले सफलता हासिल गरेका छन्।
कोशी प्रदेश जस्तो भौगोलिक र सामाजिक रूपमा विविध क्षेत्रमा प्रभावकारी सुरक्षा व्यवस्थापन गर्नु चुनौतीपूर्ण रहे पनि लम्सालले उच्च कार्यदक्षता र नेतृत्व क्षमता प्रदर्शन गरेको प्रदेश प्रहरीको मूल्यांकन छ।
उनको यस उपलब्धिले प्रहरी संगठनभित्र सकारात्मक सन्देश प्रवाह गर्नुका साथै जनतामा प्रहरीप्रतिको विश्वास अझ सुदृढ बनाउने अपेक्षा गरिएको छ।
#KishorLamsal #KoshiPolice #ExcellentPolice #NepalPolice #Jhapa #Damak #Security #LawAndOrder #NepalNews
