काठमाडौं । राष्ट्रिय स्वतन्त्र पार्टी (रास्वपा) भित्र संसदीय दलको नेता चयन प्रक्रिया अघि बढाउन आज केन्द्रीय समिति बैठक बस्दैछ। पार्टीको केन्द्रीय कार्यालयमा हुने उक्त बैठकले नेतृत्व चयनसम्बन्धी कानुनी अवरोध हटाउने तयारी गरेको जनाइएको छ।
चैत १२ गते दिउँसो २ बजे प्रतिनिधिसभा सदस्यहरूको शपथ ग्रहण कार्यक्रम तय भइसकेको छ। त्यसपछि सोही दिन अपराह्न ४ बजे बस्ने संसदीय दलको बैठकले नयाँ नेता चयन गर्ने कार्यसूची रहेको छ।
पार्टी विधान अनुसार केही प्रावधानले नेतृत्व चयनमा अवरोध देखिएकाले केन्द्रीय समितिले धारा ८० अन्तर्गतको बाधा हटाउने निर्णय गर्न सक्ने बताइएको छ। रास्वपाले अहिलेसम्म विधान महाधिवेशन सम्पन्न नगरेकाले यस्तो निर्णय गर्ने अधिकार केन्द्रीय समितिसँग रहेको छ।
बैठकपछि वरिष्ठ नेता शाह लाई संसदीय दलको नेता बनाउने आन्तरिक तयारी भइरहेको स्रोतले जनाएको छ। सांसदहरूको शपथसँगै दलको नेता चयन प्रक्रिया टुंगो लगाइनेछ।
दलको नेतृत्व चयन भएपछि चैत १३ गते रामचन्द्र पौडेल बाट प्रधानमन्त्रीको रूपमा शपथ गराउने तयारी भइरहेको छ। संविधानको धारा ७६(१) अनुसार शीतल निवासमा शपथ कार्यक्रम हुने बताइएको छ।
सरकार गठनका विषयमा पार्टी सभापति रवि लामिछाने, वरिष्ठ नेता शाह, उपसभापति डिपी अर्याल तथा स्वर्णिम वाग्ले बीच निरन्तर छलफल जारी छ। मन्त्रिपरिषद् गठन गर्दा विषयगत दक्षता र अनुभवलाई प्राथमिकता दिने रणनीति बनाइएको छ।
यद्यपि सरकारमा सहभागी हुने मन्त्रीहरूको नाम भने अझै सार्वजनिक गरिएको छैन। बिहीबारसम्ममा अन्तिम सूची टुंग्याउने तयारी भइरहेको जनाइएको छ। साथै सभामुख, प्रमुख सचेतकलगायत पद चयनबारे पनि समानान्तर रूपमा छलफल भइरहेको छ।
