जनकपुरधाम — मधेस प्रदेशमा लामो समयदेखि रिक्त रहेको सभामुखको पदमा अब पुस ६ गते नयाँ सभामुख चयन हुने भएको छ। उपसभामुख बबिता राउतले प्रदेशसभा बैठक यही मितिमा बस्दै निर्वाचन प्रक्रिया मार्फत सभामुख चयन हुने जानकारी दिएकी छन्।
उनका अनुसार सभामुख चयनका लागि आवश्यक निर्वाचन प्रक्रिया र सम्बन्धित सूचना प्रकाशित गरी सार्वजनिक गर्न प्रदेशसभा सचिवालयलाई निर्देशन दिइएको छ।
पहिले बुधबार नै प्रक्रिया अघि बढाउने तयारी रहेको थियो, तर नेकपा (एमाले) को ११ औँ महाधिवेशनका कारण त्यो प्रक्रिया स्थगित भएको थियो। महाधिवेशनका कारण एमालेका प्रदेशसभा सदस्यहरू व्यस्त भएका थिए, जसले गर्दा सभामुख चयन केही समयका लागि ढिलो भएको प्रदेशसभा सचिवालयले जनाएको छ।
पुस ६ गते बस्ने बैठकमार्फत अब मधेस प्रदेशसभाले नयाँ सभामुख पाउने अपेक्षा गरिएको छ।
