वीरगन्ज, ०३ कात्तिक : संघीय सरकारका खानेपानी मन्त्री प्रदीप यादवले बाराको बरियारपुरमा आयोजना हुने पञ्चवर्षीय गढीमाई मेलामा सहभागी हुने दर्शनार्थीहरू र भक्तजनहरूका लागि शुद्ध खानेपानीको उचित प्रबन्ध मिलाउन मन्त्रालयका अधिकारीहरूलाई निर्देशन दिएका छन्।
बाराको महागढीमाई नगरपालिका, वडा नं २, बरियारपुरस्थित गढीमाई मन्दिरमा मंसिर महिनाको दोस्रो सातादेखि पञ्चवर्षीय मेला सुरु हुँदैछ। यो मेला विश्वभरका मानिसहरूका लागि प्रसिद्ध छ, विशेषगरी पशु बलि प्रदान गर्ने परम्पराका कारण।
शनिबार बिहान, मन्त्री यादवले बरियारपुरस्थित गढीमाई मन्दिरमा दर्शन गरेपछि मेलाको तयारीको स्थलगत अवलोकन पनि गरे। अवलोकन पछि आयोजित कार्यक्रममा मन्त्री यादवले मेलामा आउने श्रद्धालुहरूको सुविधाका लागि शुद्ध खानेपानी र शौचालयको प्रबन्ध व्यवस्थित गर्न निर्देशन दिए।
कार्यक्रममा उपस्थित खानेपानी मन्त्रालयका अधिकारीहरूलाई मन्त्री यादवले मेलाको तयारीका सन्दर्भमा मेला मूल आयोजक समिति र मन्दिर सञ्चालन समितिका पदाधिकारीहरूसँग समन्वय गरी योजना बनाउने सुझाव पनि दिए। उनले यो मेलामा देश-विदेशबाट लाखौं भक्तजनहरू आउने भएकाले, उनीहरूको दर्शन र यात्रामा कुनै पनि अवरोध नहोस् भन्ने कुरा सुनिश्चित गर्नुपर्नेमा जोड दिए।
मन्त्री यादवले विगतका मेलाहरूमा खानेपानी र शौचालयको अभावका कारण दर्शनार्थीहरूले भोगेको समस्या सम्झाउँदै भने, ‘हामीले अघिल्लो अनुभवबाट पाठ सिकेर यो वर्षको मेलामा त्यस्ता समस्याहरूलाई सम्बोधन गर्नुपर्छ। मन्त्रालय त्यसका लागि पूर्ण रूपमा सहयोग गर्न तयार छ।’
गढीमाई मेलामा आउने प्रत्येक श्रद्धालुहरूको सुविधा सुनिश्चित गर्न स्थानीय सरकार र सरोकारवाला निकायहरूसँग समन्वय गरेर मन्त्रालयले आवश्यक व्यवस्थापन गर्ने प्रतिवद्धता जनाए।
कार्यक्रममा बारा क्षेत्र नं ४ का प्रतिनिधि सभा सदस्य किसान श्रेष्ठ, पूर्व सांसद प्रमोद गुप्ता, गढीमाई मेला मूल आयोजक समितिका अध्यक्ष तथा महागढीमाई नगरपालिकाका मेयर उपेन्द्र प्रसाद यादव, जितपुरसिमरा उद्योग वाणिज्य संघका अध्यक्ष मोहन शर्मा, मेला आयोजक समितिका पदाधिकारीहरू र स्थानीय अगुवाहरूको पनि उपस्थिति थियो।
