काठमाडौं । सत्तारुढ नेकपा (एमाले)ले आज राजधानीमा व्यापक शक्ति प्रदर्शन गर्दै छ। पार्टीले ‘जागरण सभा’ नाम दिइएको यो प्रदर्शन अपराह्न साढे १२ बजे काठमाडौंको दरबारमार्गमा आयोजना गर्न लागेको हो।
यसअघि बिहान साढे ११ बजे शहीद गेटबाट सुरु हुने जुलुस वीर अस्पताल, जमल हुँदै दरबारमार्गमा पुग्ने बताइएको छ। सभामा प्रधानमन्त्री एवं पार्टी अध्यक्ष केपी शर्मा ओली र महासचिव शंकर पोखरेलले सम्बोधन गर्ने कार्यक्रम छ।
पार्टीको दाबी अनुसार, आफ्ना नेतृत्वविरुद्ध फैलाइएका अफवाहलाई खण्डन गर्दै आमजनतालाई सन्देश दिने उद्देश्यले यो सभा आयोजना गरिएको हो। सभालाई प्रभावकारी बनाउन काठमाडौं, ललितपुर, भक्तपुरसहित उपत्यकाका वरपरका जिल्लाहरूबाट हजारौं मानिस सहभागी गराउने तयारी गरिएको छ।
एमालेले जागरण सभालाई आफ्नो संगठनात्मक शक्ति प्रदर्शनका रूपमा लिएको छ। प्रदर्शनका कारण राजधानीको विभिन्न स्थानमा यातायात व्यवस्थापनमा समस्या हुन सक्ने सम्भावना पनि रहेको छ।
