भारत–पाकिस्तानले आक्रान्त नेपाली विद्यार्थी : “डरले रात काट्न सक्दैनौं”, सुरक्षित फिर्तीको माग

२६ वैशाख, काठमाडौं — भारत र पाकिस्तानबीच पछिल्ला दिनमा चर्किएको तनावका कारण सीमावर्ती क्षेत्रका नेपाली विद्यार्थीहरू त्रासमा परेका छन् । लाहोर, फैसलावाद, कराँची, सियालकोटदेखि भारतको हिमाञ्चलसम्म रहेका नेपाली विद्यार्थीहरू सुरक्षाको डरले पढाइ छोडेर स्वदेश फर्कन चाहिरहेका छन् ।

पाकिस्तानको लाहोरमा अध्ययनरत एक नेपाली विद्यार्थीले अनलाइनमार्फत आफ्नो पीडा सुनाउँदै भने, “रात बिताउन गाह्रो छ, ड्रोनको आवाज, साइरन र बमजस्तै आवाजहरू निरन्तर सुनिन्छ । हामी विद्यार्थी हौं, युद्धमा संलग्न छैनौं, तर डरले बाँच्नै गाह्रो छ ।”

उनका अनुसार भारत–पाकिस्तानको तनावपछि विश्वविद्यालयहरू बन्द भएका छन् । धेरै नेपाली विद्यार्थी टिकट खोज्दै फिर्तीको बाटो हेरे पनि हवाइ सेवा सहज नभएको गुनासो छ । “लाहोरमा मात्र करिब २ सय नेपाली विद्यार्थी छन्,” उनले भने, “सबैजना स्वदेश फर्कन चाहिरहेका छौं ।”

भारतको हिमाञ्चल प्रदेशस्थित चित्कारा विश्वविद्यालयमा रहेका नेपाली विद्यार्थीसमेत त्रासमा छन् । “हामी अध्ययन गर्न आएका थियौं, अहिले बाँच्ने चिन्ताले थिचिएको छौं,” विश्वविद्यालयका विद्यार्थी सञ्जय गुप्ताले भने, “प्राध्यापक, कर्मचारी त छाडेर गइसके । हामी केवल केही वार्डेन र मेसका स्टाफसँग बाँकी छौं ।”

पञ्जाब, चण्डीगढ र हिमाञ्चल क्षेत्रका विश्वविद्यालयहरूमा रहेका विद्यार्थीहरू लगातार घर फोन गरेर सहयोग मागिरहेका छन् । तर, न हवाइ टिकट पाइरहेका छन्, न त भारतभित्र गाडी चढ्न सजिलो भएको छ । “बसपार्कमा भिड छ, दोब्बर भाडा तिरेर पनि गाडी पाइँदैन,” अर्को विद्यार्थीले बताए ।

नेपालस्थित परराष्ट्र मन्त्रालयले भने पाकिस्तान र भारतमा रहेका नेपाली विद्यार्थीहरूसँग निरन्तर सम्पर्कमा रहेको जनाएको छ । मन्त्रालयका अनुसार इस्लामाबादस्थित नेपाली दूतावासले विद्यार्थीहरूको अवस्थाबारे बुझी समन्वय गरिरहेको छ ।

दूतावासकी सचिव वृन्दा सुवेदी खड्काले भनिन्, “विद्यार्थीहरू त्रासमा हुनुहुन्छ, तर हामी निरन्तर सम्पर्कमा छौं । सुरक्षित फिर्तीका लागि नेपाल सरकारसँग समन्वय भइरहेको छ ।”

विद्यार्थीहरूले सरकारलाई एक स्वरमा आग्रह गरेका छन् — “हामीलाई सुरक्षित रूपमा नेपाल फर्काउने वातावरण बनाइदिनुहोस् ।”