काठमाडौं, १७ बैशाख — नागरिक उन्मुक्ति पार्टीका संरक्षक र पूर्वसांसद रेशम चौधरी मंगलबार दिउँसो काठमाडौंस्थित प्रज्ञा भवनबाट पक्राउ परेका छन्। नागरिक उन्मुक्ति पार्टी र जनमत पार्टीबीच पार्टी एकता घोषणा गर्न लागिएको कार्यक्रमस्थलमै प्रहरीले उनलाई नियन्त्रणमा लिएको हो।
पक्राउको कारण सार्वजनिक नगरिएको प्रहरीले चौधरीलाई एकाएक कार्यक्रममा उपस्थित जनसमुदायकै बीचबाट नियन्त्रणमा लिँदा स्थिति केहीबेर तनावपूर्ण बनेको थियो।
२०७२ साल भदौमा टीकापुरमा भएको भीषण हिंसात्मक घटनामा दोषी ठहर भएका चौधरीलाई जन्मकैदको सजाय सुनाइएको थियो। तर २०८० सालको गणतन्त्र दिवसको अवसरमा राष्ट्रपतिको आममाफीपछि उनी कारागारमुक्त भएका थिए। आममाफीपश्चात जेठ १५ गते उनी डिल्लीबजार कारागारबाट रिहा भएका थिए।
नेपालको संविधानको धारा २७६ तथा फौजदारी कार्यविधि संहिताको दफा १५९ बमोजिम उनको रिहाइ गरिएको थियो। कुल ५ वर्ष ३ महिना जेल सजाय भुक्तान गरेका चौधरीप्रति टीकापुर घटनासँग सम्बन्धित पीडित शारदा कडायतले सर्वोच्च अदालतमा रिट दायर गरेकी थिइन्।
कडायत, टीकापुर घटनामा मारिएका प्रहरी निरीक्षक केशव बोहोराकी धर्मपत्नी हुन्। चौधरीको रिहाइविरुद्ध दायर उक्त रिटमा अझै सुनुवाइ जारी छ भने निर्णय आइसकेको छैन।
पार्टी एकताको सन्दर्भमा चौधरीको पक्राउ राजनीतिक रूपमा समेत संवेदनशील मानिएको छ। यस घटनाले नागरिक उन्मुक्ति र जनमत पार्टीबीचको सम्भावित एकता प्रक्रियामा असर पर्ने अनुमान गरिएको छ।
