बिरगञ्ज, जेठ ११
देशको व्यावसायिक सवारी क्षेत्रमा सशक्त उपस्थिति बनाउँदै आएको महिन्द्राले नेपालमा पहिलोपटक १.७ टन लोड क्षमता भएको बोलेरो पिक-अप फ्ल्याटबेड 1.7T सार्वजनिक गरेको छ। अग्नि इन्करपोरेटेड प्रा.लि., महिन्द्राको नेपालस्थित आधिकारिक वितरक संस्था, ले बिरगञ्जस्थित शोरूममा एक औपचारिक कार्यक्रमबीच यस नयाँ पिक-अप भेरियन्टको सार्वजनिक अनावरण गर्यो।
उक्त कार्यक्रममा पर्सा उद्योग वाणिज्य संघका अध्यक्ष हरि गौतम, अग्नि ग्रुपका वरिष्ठ पदाधिकारी, सञ्चारकर्मी तथा व्यवसायिक ग्राहकहरूको उल्लेखनीय उपस्थिति देखिएको थियो।
नयाँ शक्ति, नयाँ सुविधा
महिन्द्राको बोलेरो श्रृंखला टिकाउ, भरपर्दो र व्यावसायिक प्रयोगमा उपयुक्त सवारीका रूपमा पहिचान बनाइसकेको छ। त्यसलाई अझ सशक्त बनाउँदै सार्वजनिक गरिएको 1.7T पिक-अपमा २.५ लिटर क्षमताको एमटु-डिआइ-सिआर डिजेल इन्जिन जडान गरिएको छ, जसले ६३ बिएचपी शक्ति र १९५ एनएम टर्क उत्पन्न गर्छ।
९ फिट लामो कार्गो बेड, डबल बेयरिङ एक्जिल र ९ पाताको स्प्रिङ सस्पेन्सनले गाडीलाई भारी लोडमा पनि मजबुत बनाएको छ। कठिन भूगोलमा संचालन हुने नेपाली व्यवसायिक यातायात प्रणालीको आवश्यकतालाई ध्यानमा राख्दै यो पिक-अप डिजाइन गरिएको कम्पनीको दाबी छ।
यात्राको सहजता पनि मुख्य प्राथमिकता
सिर्फ क्षमता मात्रै होइन, नयाँ बोलेरो पिक-अपमा चालक तथा सहचालकको सहजता र आरामलाई पनि विशेष ध्यान दिइएको छ। फराकिलो सिट, हेडरेस्ट, रिक्लाइन फिचरजस्ता इन्टेरियर सुविधाहरू समावेश गरिएका छन्। साथै, उत्कृष्ट इन्धन क्षमता (माइलेज) ले सञ्चालन खर्चमा पनि बचत हुने विश्वास गरिएको छ।
मूल्य र फाइनान्स योजनामा लचिलोपना
बोलेरो पिक-अप 1.7T को प्रारम्भिक मूल्य रु. २५ लाख ६५ हजार निर्धारण गरिएको छ। साथै, अग्नि ग्रुप अन्तर्गतको अग्नि हायर पर्चेज सेवामार्फत ग्राहकहरूले सजिलो किस्ताबन्दी योजना उपयोग गर्न सक्नेछन्। यो योजनामा ७०% सम्म फाइनान्स सुविधा, ९.९९% वार्षिक ब्याजदर, शून्य प्रोसेसिङ शुल्क, सरल कागजी प्रक्रिया र छिटो कर्जा स्वीकृतिको सुविधा समावेश गरिएको छ।
पुरानो पिक-अप साट्ने चाहना भएका ग्राहकहरूलाई लक्षित गर्दै *अग्नि आस्था प्रा.लि.*मार्फत सजिलो एक्सचेन्ज सेवा पनि उपलब्ध गराइनेछ।
व्यवसायिक सवारी बजारमा बलियो पकड
नेपालको व्यावसायिक सवारी बजारमा बोलेरो पिक-अप सबैभन्दा बढी बिक्री हुने मोडलको रूपमा स्थापित रहँदै आएको छ। यसको निर्माण गुणस्तर, सेवा सञ्जाल र ग्राहक विश्वासले गर्दा महिन्द्राले बजारमा अग्रणी स्थान कायम राख्न सफल भएको हो।
नयाँ 1.7T संस्करणले महिन्द्राको व्यावसायिक सवारी पोर्टफोलियोलाई थप सुदृढ बनाउने र देशभरिका व्यवसायीहरूलाई भरपर्दो ढुवानी समाधान उपलब्ध गराउने विश्वास गरिएको छ।
