काठमाडौँ — नेपाली कांग्रेसकी केन्द्रीय सदस्य तथा सांसद माया राईलाई प्रहरीले शनिबार राति पक्राउ गरेको छ। अपराध अनुसन्धान कार्यालयका प्रमुख एसएसपी रमेश बस्नेतका अनुसार राति साढे ८ बजे राईलाई काठमाडौँको कपनस्थित उनको निवासबाट नियन्त्रणमा लिइएको हो।
बस्नेतले बताएअनुसार, पक्राउ परेकी राईलाई हालै प्रहरी परिसर, काठमाडौंमा बुझाउने तयारी भइरहेको छ। राईमाथि कालिमाटीस्थित स्वर्णलक्ष्मी बचत तथा ऋण सहकारी संस्थाको ठुलो रकम अपचलन गरेको आरोप लागेको छ। सोही प्रकरणमा काठमाडौं जिल्ला अदालतले उनको नाममा पक्राउ पुर्जी जारी गरेको थियो।
राई सो सहकारी संस्थाको सञ्चालक समितिमा रही सहसचिवका रूपमा कार्यरत थिइन्। उनीसहित केही व्यक्तिमाथि ६९० जना बचतकर्ताको अर्बौं रुपैयाँ हिनामिना गरेको गम्भीर आरोप लागेको छ।
प्रहरीका अनुसार, राईमाथि सहकारी ठगी तथा संगठित अपराधमा संलग्न रहेको अभियोगमा मुद्दा अगाडि बढाइने तयारी गरिएको छ।
