https://play.google.com/store/apps/details?id=com.toeato.toeato
वीरगञ्ज, फागुन १७
वीरगञ्जमा सुरु भएको दोस्रो संस्करणको वीरगञ्ज गोल्डकप फुटबल प्रतियोगितामा आयोजक वीरगञ्ज युनाइटेड क्लबले विजयी सुरुवात गरेको छ।
शनिबार सम्पन्न उद्घाटन खेलमा वीरगञ्ज युनाइटेड क्लबले भारतीय टोली गरवाल डाइमण्ड फुटबल क्लब दिल्लीलाई १-० गोलअन्तरले पराजित गर्दै आफ्नो खाता खोलेको हो। खेलको पहिलो हाफमा दुवै टोलीले कुनै गोल गर्न सकेनन्। तर, खेलको ५२औं मिनेटमा गरवाल डाइमण्डका खेलाडी सन्दीप रानाको आत्मघाती गोलका कारण वीरगञ्ज युनाइटेडले अग्रता बनायो।
खेलको अन्तिमसम्म गरवाल डाइमण्ड फुटबल क्लबले बराबरी गर्ने प्रयास गरे पनि सफल हुन सकेन। म्यान अफ द म्याच वीरगञ्ज युनाइटेड क्लबका विपिन मगर घोषित भए।
प्रतियोगिताका अन्य खेलहरू
आयोजकका अनुसार भोलि सहलेश फुटबल क्लब सिरहा र सङ्कटा फुटबल क्लब काठमाडौंबीच प्रतिस्पर्धा हुनेछ। यस प्रतियोगितामा नेपालका विभिन्न राष्ट्रिय स्तरका आठ टोलीहरू सहभागी छन्।
विजेता र उपविजेताका लागि आकर्षक पुरस्कार
प्रतियोगिताको विजेता टिमले नगद ११ लाख ११ हजार एक सय एघार रुपैयाँसहित ट्रफी, मेडल, र प्रमाणपत्र प्राप्त गर्नेछ। उपविजेता टोलीले ५ लाख ५५ हजार पाँच सय ५५ रुपैयाँ नगदसहित ट्रफी, मेडल, र प्रमाणपत्र प्राप्त गर्नेछ।
दर्शकका लागि विशेष व्यवस्था
मुख्य प्रायोजक वीरगञ्ज महानगरपालिकाले दर्शकका लागि बाँसको प्रयोग गरी अस्थायी प्याराफिट निर्माण गरेको छ, जसमा झण्डै दुई हजार दर्शक अटाउन सक्ने क्षमता रहेको छ। साथै, मैदानको अन्य भागमा करिब तीन हजार दर्शक अटाउन सक्ने व्यवस्था गरिएको छ।
शनिबार सम्पन्न उद्घाटन खेलको औपचारिक शुभारम्भ वीरगञ्ज महानगरपालिकाका नगरप्रमुख राजेशमान सिंहले गरेका थिए।
