चितवन — चितवनको भरतपुर महानगरपालिका अन्तर्गत गोन्द्राङदेखि पुल्चोकसम्म विस्तार गरिएको छ लेनको आधुनिक सडक आज शुक्रबार एक कार्यक्रमका बीच औपचारिक रूपमा सञ्चालनमा ल्याइएको छ।
सडकको उद्घाटन प्रधानमन्त्री केपी शर्मा ओलीले गरेका हुन्। उद्घाटन समारोहमा उपप्रधानमन्त्री तथा सहरी विकासमन्त्री प्रकाशमान सिंह, भौतिक पूर्वाधार तथा यातायात मन्त्री देवेन्द्र दाहाल, भरतपुर महानगर प्रमुख रेनु दाहाल लगायत विभिन्न मन्त्रालयका अधिकारी तथा स्थानिय जनप्रतिनिधिहरूको उपस्थिति रहेको थियो।
उक्त सडक विस्तारले भरतपुर सहरको यातायात सहज बनाउने विश्वास लिइएको छ। लामो समयदेखि ट्राफिक जामको समस्याबाट ग्रसित भरतपुरवासीका लागि यो सडकले ठूलो राहत पुर्याउने स्थानीयको प्रतिक्रिया छ। समारोहमा बोल्दै प्रधानमन्त्री ओलीले देशभर आधारभूत पूर्वाधारको विकासमार्फत समृद्धिको आधार निर्माण गरिने प्रतिवद्धता जनाए।
उक्त परियोजना भौतिक पूर्वाधार तथा यातायात मन्त्रालयको समन्वयमा सम्पन्न गरिएको हो। सडकमा आधुनिक ड्रेनेज प्रणाली, यातायात संकेत चिन्ह र सौन्दर्यकरणसमेत गरिएको छ।
कार्यक्रममा सहभागी जनप्रतिनिधिहरूले भरतपुर महानगरलाई स्मार्ट सहरतर्फ उन्मुख गराउन यस्ता पूर्वाधारले सहयोग पुर्याउने विश्वास व्यक्त गरे।
