पर्सा जिल्लाका स्थायी बासिन्दा अनिल कुमार साहले अधिवक्ताको अनुमति पत्र प्राप्त गरेसँगै समाजप्रतिको दायित्वलाई व्यवहारमा उतार्ने प्रतिबद्धता जनाउनुभएको छ। उहाँले आर्थिक अभावका कारण न्यायबाट वञ्चित हुनुपर्ने अवस्थाको अन्त्य गर्न अबदेखि गरिब तथा विपन्न वर्गका नागरिकहरूको मुद्दा निःशुल्क रूपमा लड्ने घोषणा गर्नुभएको हो।
“कानुन सबैका लागि बराबर हुनुपर्छ, आर्थिक कमजोरी न्याय प्राप्तिको अवरोध बन्नु हुँदैन,” अधिवक्ता साहले बताउनुभयो। उहाँका अनुसार पेशागत सफलतासँगै मानवीय सेवामा समर्पित हुनु नै आफ्नो मुख्य उद्देश्य हो।
नवप्रवेशी अधिवक्ताको यस निर्णयलाई कानुनी क्षेत्रका जानकारहरूले सकारात्मक रूपमा लिएका छन्। समाजमा न्यायप्रति विश्वास बढाउन र कमजोर वर्गको आवाज सशक्त बनाउन उहाँको पहल प्रेरणादायी बन्ने अपेक्षा गरिएको छ।
